माझ्या प्रवासास

माळावरची ओसाड वाट
पायांनी तुडवीत जातांना
रानांची हिरवळ गार
अंगावर झेलत जाताना

भूमी , जल असो वा आकाश
मार्गांची पर्वा नसताना
अवकाशातल्या उड्डाणांनी
पृथ्वीला गवसणी घालताना

मनाच्या खोल खोल तळात
मत्स्यापरी सुळकांडी मारताना
अन कल्पनेच्या पंखांनी
ज्ञानाचा वेध घेताना

'स्व'चा अविरत शोध होतसे
माझ्या प्रवासास चालना
थांबणे नलगे तिथवर जिथे
बदलतात मर्यादांच्या संकल्पना.

© Archana Patil-Harankhedkar

नव्या संकल्पांची नांदी

नव्या संकल्पांची नांदी
माझ्या संस्कारात रुजलेली
नव्या कल्पनांची चित्रे
मनःपटलावर उमटलेली.

आपसूक घडण्याची कला
निसर्गालाच खरी कळली
या पामराजवळ मात्र
दोन हातांची संपत्ती भली.

घडणाऱ्या ह्या घड्यावर
आशांची नक्षी काढलेली
संकल्पांना प्रत्यक्षात आणण्या
प्रयत्नांची कास धरलेली.

© Archana Patil-Harankhedkar

पहिला पाऊस

क्षितिजावरती घडून मिलन
चोहीकडे निःशब्द तरंग

इंद्रधनूच्या तेजस्वी बाणांनी
उधळले आसमंती सप्तरंग

नित्याप्रमाणे ह्याही वेळी
जलवर्षावाने भिजली भूमी

पहिल्याच पावसाने तृप्त होऊन
बाल वनश्रीस जन्म घाली

© Archana Patil-Harankhedkar

सौंदर्याचे मोती

संथसावळ्या पाण्यावर
तरंगांची सुबक नक्षी
भोवरे गरगर फेर धरती
नाचत छंदे जलाशयी पक्षी.

भोवऱ्यांची रुपेरी वर्दळ
तरंगांचा दाटे गोंधळ
चिमुकलिशी लाटही तिथे
गाजवित येते वेगे खळखळ.

पाण्यावरची वाट माझी
अडवित येते सृष्टी चंचल
अलिकडे अन पलिकडे हिरव्या
प्रतिबिंबांचा खेळ अविरत.

क्षणभर मनाचे फुलपाखरू
विसावले ह्या कल्पनेवरही
तळ्याच्या अंतरामधी किती
दडवले सौंदर्याचे मोती.


दृष्टीसुख उपभोगण्या
निसर्गाने उघडले द्वार
मानवलोचना असावे तत्पर
अनुभवण्या आनंद अपार.

© Archana Patil-Harankhedkar

एक आठवण

हिरव्या हिरव्या रानामधली
गोड कूजने कानी पडली
मना अवचित हरखून गेली
गे कोकिळा तू काय बोलली?

तुझे गायन कानी पडता
चिरपरिचित वाटत असता
ह्या शांत सळसळीचा
अभिन्न अंग झाले जाणवता

सहजच एक आठवण जागी झाली
बालपणीच्या पिंपळाखाली
अशीच किलबिल जागत होती
सकाळच्या गुलाबी पांघरुणाभवती

कर्णमधुर ती नसली जरिही
त्या वेळी अन त्या काळी
कोवळेल्या त्या कळीशी
नकळत तिची मैत्री झाली

दुधाळ चांदण्यांच्या फुलांमागून
ह्या ध्वनिचा गंध उधळला
स्वप्नांमधेही प्रकाशासवे
नादभऱ्या उषेचा छंद उगवला

झुळुकिसवे झुलणाऱ्या
गे कोकिळे त्या कळीसारखी
एक आठवण तुझ्या कूजने
माझ्या मनात जागती झाली

© Archana Patil-Harankhedkar